Мэдээ

Монгол Улсын Ерөнхийлөгч У.Хүрэлсүх Монгол Улсаас Оросын Холбооны Улсад суугаа Элчин сайдын яамны 100 жилийн ойд зориулан мэндчилгээ дэвшүүлэв

Монгол Улсын Ерөнхийлөгч Ухнаагийн Хүрэлсүх Монгол Улсаас Оросын Холбооны Улсад суугаа Элчин сайдын яамны 100 жилийн ойд зориулан мэндчилгээ дэвшүүлэв.

            УГ МЭНДЧИЛГЭЭНД:

“Өнгөрөгч 2021 онд Монгол Улс, Оросын Холбооны Улсын хооронд дипломат харилцаа тогтоосны 100 жилийн ойг хоёр орны ард түмэн өргөн дэлгэр ёслон тэмдэглэсэн бөгөөд энэхүү түүхэн ойн үргэлжлэл болсон Монгол Улс хойд хөршийн нийслэл Москва хотод анхны Элчин сайдын яамаа байгуулсны 100 жилийн ой энэ жил тохиож байна.

Энэ нь Монгол Улсын гадаад харилцааны салбарын түүхэнд тэмдэглэгдэн үлдэх чухал үйл явдал төдийгүй Монгол, Оросын уламжлалт найрамдалт харилцааны хөгжлийн салшгүй хэсэг билээ.

Монгол Ард Улсын Засгийн газраас Зөвлөлт Орос Улсад Монгол Улсын төлөөний газрыг нээн ажиллуулахаар шийдвэрлэж, Ардын Засгийн газрын 1922 оны 03 дугаар сарын 31-ний өдрийн 95 дугаар тогтоолоор Монгол Ард Улсаас Зөвлөлт Орос Улсад суух анхны Элчин сайдаар Ж.Давааг томилон “гүн” зэрэг өргөмжилж байжээ.

Ж.Даваа 1922 оны 05 дугаар сарын 30-ны өдөр Зөвлөлт Орос Улсын Гүйцэтгэх хорооны дарга М.Калининд Итгэмжлэх жуух бичгээ өргөн барьсан бөгөөд энэ өдрийг Москва дахь Монгол Улсын Элчин сайдын яам үүд хаалгаа нээсэн өдөр хэмээн үздэг юм.

Өнгөрөгч 100 жилд Монгол-Зөвлөлт, Монгол-Оросын найрсаг харилцаа, бүх талын хамтын ажиллагааг өргөжүүлэн хөгжүүлэх үйлсэд үе үеийн олон дипломат, манай улсын өндөр эрдэм боловсролтой олон сэхээтэн ажиллаж ирсэн бөгөөд өдгөө 29 дэх Элчин сайд Монгол Улсынхаа хөгжил дэвшлийн төлөө өөрийн улсын ашиг сонирхлыг хамгаалах, найрсаг Оросын ард түмэнтэй нягт хамтран ажиллах үүрэгт ажлаа нэр төртэйгөөр Москва хотноо гүйцэтгэж байна.

Зууны түүхтэй Монгол, Оросын харилцаа эдүгээ 2019 оны 09 дүгээр сарын 03-ны өдөр Улаанбаатарт хоёр орны Төрийн тэргүүн нарын байгуулсан найрсаг харилцаа, иж бүрэн стратегийн түншлэлийн тухай  Монгол Улс, Оросын Холбооны Улс хоорондын гэрээний үзэл санааны дагуу бүх салбарт амжилттай хөгжиж байна.

Монгол, Оросын хооронд дипломат харилцаа тогтоосны 100 жилийн ойг тохиолдуулж Монгол Улсын Ерөнхийлөгчийн Оросын Холбооны Улсад 2021 оны 12 дугаар сард хийсэн албан ёсны айлчлал нь хоёр улсын харилцааг шинэ зуунд өргөжүүлэн хөгжүүлэх чиг хүрээг тодорхойлоход онцгой үүрэг гүйцэтгэсэн тул айлчлалын үеэр тохиролцсон асуудлуудыг ажил хэрэг болгоход Москва дахь Элчин сайдын яам анхаарал хандуулан хариуцлагатай ажиллах нь зүйтэй.

Монгол Улсаас Оросын Холбооны Улсад суугаа Элчин сайдын яамны одоогийн хамт олон энэхүү түүхэн харилцааг улам баяжуулан гүнзгийрүүлж, Монгол, Оросын олон талт хамтын ажиллагааны хөгжилд  бодит хувь нэмэр оруулна гэдэгт итгэл төгс байгаагаа илэрхийлье.

Бүх талын хамтын ажиллагааг хөгжүүлэхэд хичээнгүйлэн зүтгэж, үнэтэй хувь нэмэр оруулсан үе үеийн Элчин сайдууд, дипломат ажилтнууд, тэдгээрийн гэр бүл, үр хүүхдэд ойн баярын мэндчилгээ дэвшүүлж, сайн сайхан бүхнийг хүсэн ерөөе” гэжээ.

Дэлгэрэнгүй

Холбоотой нийтлэл

Leave a Reply

Your email address will not be published. Required fields are marked *

Back to top button